Noverint universi quod nos, Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros, in emenda et restitucione illarum centum jovatarum terre, quas vobis centum confratribus Calatajubii dare debebamus ad annonem in Sogon, donamus nunc et tradimus ac concedimus vobis, centum confratribus Calatajubii et vestris imperpetuum, totam turrim sive alqueriam in Valencia que dicitur Turris de Montcada, ad habendum, tenendum, possidendum, expletandum, per hereditatem propriam, francham et liberam, cum introitibus, exitibus, terminis, pratis, paschuis, herbis, aquis, lignis, furnis et molendinis, salvo et excepto iure et medietate quam in molendinis Sancius de Bolas habere debet, cum heremo et populato, et pertinenciis universis a celo in abisum, ad dandum, vendendum, et ad omnes vestras et vestrorum voluntates cuicumque volueritis faciendas, exceptis militibus et sanctis.

Salvo et retento nobis et nostris in perpetuum, in predicta turre sive alqueria et hominibus ibi habitantibus, exercitu, cavalcata, justiciis, caloniis, et dominio.

Datum Valencie idus novembris anno Domini Mº CCº XLº.

Sig+num Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Huius rei testes sunt: [1ª col.] G. de Entença; [2ª col.] P. Ferrandi, R. de Liçana; [3ª col.] Exciminus de Focibus, A. de Gudal.

Signum + Guillemoni Scribe, qui mandato domini Regi pro domino Berengario, Barchinonensi episcopo cancellario suo, hec scripsit loco die et anno prefixis.

Lecta fuit Regi.